1986 жылы 8 қыркүйекте Қызылорда қаласында дүниеге келген. № 9 мектеп-гимназияның 1993 жылғы түлегі.

2002 жылы М.Мәметова атындағы гуманитарлық колледждің «Саздық білім беру» бөліміне түсіп, 2006 жылы аяқтап, Қорқыт Ата атындағы Қызылорда Мемлекеттік университетінің «Музыкалық білім» факультетінде білімін жалғастырады. 

 Алғашқы еңбек жолын 2010 жылы Қызылорда облыстық филармониясының әртісі қызметін бастады.

 2010 жылы Қарағанды қаласында өткен М.Бәпиұлының 130 жылдығына арналған республикалық конкурста бақ сынап, Ғарифолла Құрманғалиев атындағы арнайы жүлдеге ие болды. 

 2011 жылғы Астана қаласында өткен Ә.Қашаубаев атындағы дәстүрлі орындаушылардың VII республикалық конкурсының лауреаты.

 Елбасының «Болашаққа бағдар: рухани жаңғыру» бағдарламасы аясында Сырдария ауданының Бесарық, Айдарлы, Н.Илиясов, Ақжарма ауылдарында және қалаға қарасты Абай, Ақсуат ауылдарында «Ән-аманат» тақырыбымен бірнеше жеке концерттерін берсе, «Ақмешіт» фольклорлық ансамблімен бірге Өзбекстан Республикасының Науаи қаласында, Жаңақорған, Шиелі, Арал аудандарында, гастрольдік сапарда болып, жоғары деңгейде өнер көрсетті. 

2020 жылы елде енгізілген пандемия уақытында филармонияның Facebook, Instagram парақшаларында және «Сыр шаңырағы» ютуб каналында «Жаухар жыр» айдарымен тікелей эфирде өнер көрсетсе,  «Ақмешіт» фольклорлық ансамблінің сүйемелдеуімен «Дариға-дәурен» атты концертін берді 

2022 жылы Алматы қаласында өткен Сыр бойы дәстүрлі орындаушыларының «Сыр сүлейін сұрасаң...» атты жыр кешінде бүтін өнердің берекесін келтірген майталман жыршы-термешілермен бірге өнер көрсетті.  Сондай-ақ, ҚР еңбек сіңірген қайраткері, әнші-композитор Ә.Ноғайбаевтың 75жылдығына арналған «Әні әдемі Әлмырза» атты республикалық фестивальге қатысып, Шиелі ауданы әкімінің алғыс хатымен марапатталды.

Сыр елінің мәдениеті мен өнеріне қосқан үлесі үшін облыс әкімінің, мәдениет басқармасының бірнеше алғыстарымен, 2022 жылы Қазақстандық салалық мәдениет, спорт, туризм және ақпарат қызметкерлерінің кәсіптік одағының «Еңбек даңқы» төсбелгісімен, 2023 жылдың қорытындысымен филармонияның оң имиджін қалыптастырудағы еңбегі үшін филармония басшысының алғыс хатымен марапатталды.