Анамен әлем нұрлы. Біз ізгілікке барар жолды ана арқылы табамыз. Көңілді бұлт торлап, сенімге селкеу түссе, алдымен әйел заты араша түседі. Бұл – Тәңірдің мейіріміндей көркем қасиет. Сондықтан анаға көрсеткен құрмет – ең ұлы құрмет. Осы ретте, бүгін аяулы аналар мен арулардың төл мерекесіне орай облыстық филармония эстрадалық орындаушылары «Аналарға тосын сый» атты қойылым-концертін көрерменге ұсынып, ғазиз жүректі нәзік жандарға ерекше кеш сыйлады. Көрерменді бір толқытып, бір тебіренткен концерт әсем ән, әсерлі қойылым, әдемі бимен көмкеріліп, салтанатты күннің сәнін келтірді. 

Керемет кешке өнер иелерін өмірге әкелген алтын құрсақты аналар қонақ ретінде шақырылып, кеш барысында ұл-қыздары аяулы аналарының құшақтарын гүлге толтырды. Аяулы жандарын құрмет пен қошеметке бөлеп, алғысын әнмен жеткізді. 

Жан жадыратып, көңіл толқытқан кеште Қазақстанның Еңбек сіңірген әртісі К.Қалымбетова, ҚР "Мәдениет қайраткері" төсбелгісінің иегері Ү.Медеуова, әнші, ақын, сазгер, ҚР "Мәдениет саласының үздігі" төсбелгісінің иегері И.Елубаева, ҚР "Мәдениет саласының үздігі" төсбелгісінің иегерлері Р.Ысқақова, Г.Әлиханова және «Тұран» триосы өнер көрсетті. 

Қойылымның бас кейіпкерлері, филармония солистері Б.Молдабергенов, А.Шадаев, О.Нұралиев, Б.Найманов, Р.Үсенов, И.Баимбетова, Г.Бисекенова, А.Төреғали, А.Әбді, Д.Қыдырбай, жұлдызды жұп Әлішер мен Арай және аралас хор ұжымы (Жетекшісі – А.Қуаныш), "Томирис" би ансамблі (Жетекшісі — М.Тойбазарова) және «Ai-Aru» заманауи би ансамблі (Жетекшісі – З.Стықбаева) көрерменге қайталанбас жарқын эмоциялар мен ұмытылмас сәт сыйлады. 

Әлемдегі ең асыл жандардың мерейлі күні осылайша әдемі нотамен қорытындыланды. Кеш соңында көрермен асқан ризашылықтарын білдіріп, өнер иелеріне гүл шоқтарын табыстады. 

Мерейлі кештің сценарист-режиссері – Мәдениет саласының үздігі, «Шеберлік шыңы» номинациясының иегері Азиза Издикулова.