Биыл қызылордалықтар және қала қонақтары Ұлыстың Ұлы күнін айрықша атап өтуде. Қазақтың ұлттық салт-дәстүрлерін, ұлттық ойындар мен этноауылды, қарашүйлер, Сыр жұлдыздары қойған концертті тамашалау үшін қала тұрғындары таңертеңнен бастап Өнер орталығы аумағына қарай ағыла бастады. Ұлттық мерекені тойлауға келген көпшілікті батырлардың сауыт-сайманын асынған бойшаң жігіттер мен ұлттық киім киген арулар қарсы алды. Қала тұрғындары әр жерде құрылған сайыс алаңдарына жиналып, ұлттық ойындарды тамашалады. Оның ішінде жігіттер арқан тартысып, қол күрестіріп, қазақша күресте бақ сынасса, балалар асық атып, қыздар алтыбақан тебісті. Этноауылда ұйымдастырылған қазақтың ұлттық ойындарын қызықтап мәз-мейрам болғандардың да қатары қалың. Жиылған халық ыстық бауырсақ пен өзге де ұлттық тағамдардан дәм татып, мәре-сәре күйде болды.