ӘН МЕН ЖЫРДЫҢ АСПАНЫНДА ҚАЛЫҚТАП...
2025-03-12
Бүгін Жыраулар үйінде Нартай әншілік өнерінің өкілі, ақын-жырау, әнші-композитор Құрманбек Бекпейісовтың 60 жылдығына арналған еске алу кеші өтті. Құрманбек Сейдахмедұлы 15 жасынан бала жырау атанып, Сырдың сырлы мақам-саздарын, жыр-термелерін елге насихаттап, Нартай мұрасын бүгінгі ұрпаққа жеткізген ерекше дарын иесі. Ол Нартай ақынның 27 әнін өзінің орындауында нота парақшасына түсіріп, қазақтың музыка өнеріне мол мұра қалдырған.
Еске алу кешінде Құрманбек Бекпейісовпен үзеңгілес өмір сүрген өнер саңлақтары өз естеліктерімен бөлісіп, әнші шығармашылығындағы көпшілік біле бермейтін құнды ақпараттарды айтып өтті. Ақсақал Пернебай Ізмәмбетұлы, режиссер Оңталап Нұрмаханов, ақын Серік Ыдырысов, композитор Рамазан Тайманов өнер иесі жайында ой толғады. ҚР «Мәдениет саласының үздігі» төсбелгісінің иегері Ақмарал Ноғайбаева Құрманбек Бекпейісовтың «Әнші сезімі» әнін нақышына келтіріп орындады. Шәкірті Нұртілек Ақтаев, Тоғжан Өтенова да өз өнерлерін ортаға салып, тағылымды кешке көрік берді.
Баба мұрасын жалғастырушы жыршы, ұлы Бекпейіс Мұхаммедәлі Құрманбекұлы және Құрекеңнің жары Бәтішева Рыскүл еске алу кешіне арнайы қатысып, барша ұйымдастырушыларға аналық алғысын жеткізді.