Бүгін Қызылорда облыстық филармониясы Жыраулар үйінде тұрмыс-салт жырының көне түрі бесік жыры насихатталған «Әлди — ән-жырым» атты шеберлік дәрісі өтті. Тағылымды шараны «Мәдениет саласының үздігі» төсбелгісінің иегері, Нартай жыр мектебінің өкілі Ақмарал Ноғайбаева тізгіндеді. 

Ана әлдиін, бесік жырын, бесіктің шығу тарихын аңыз-әпсана арқылы жеткізген кеште көрермен рухани қуаттанып, ұлттық құндылықтарымызды тереңнен тани түсті. Шараға Шиелі ауданы, Бәйгеқұм ауылының «Ақ әжем — алтын қазынам» әжелер ансамблі арнайы қатысып, бесік жырының көне үлгісін көрерменге ұсынды. 

Шеберлік сағатында әнші, сазгер «Құрмет» орденінің иегері Әлмырза Ноғайбаев та өнер көрсетті. Сонымен қатар, Т.Нағашыбаевтың «Ана әлдиі», Р.Үсеновтың «Ана жүрегі» секілді заманауи нұсқада өңделген бесік жырлары шырқалды. 
 
130 000 нәрестенің дүниеге келуіне және 8000-дай жағдайы ауыр ананың өмірін сақтап қалуға үлес қосқаны үшін жоғарғы санаттағы "Алтын дәрігер" атанған Гүлнар Хамзақызы медицинада баланы бесікке бөлеудің мән-мағынасына тоқталды. Сондай-ақ, Жалағаш ауданынан арнайы келген Қаншагүл Шоңмұрынқызы да кеш соңында сөз алып, рухани шараның жалғасын табуына тілектестік білдірді. 

Ұлттық құндылықтар дәріптелген шеберлік сағатының режиссері – ҚР Мәдениет саласының үздігі, "Шеберлік шыңы" номинациясының иегері Азиза Іздіқұлова