Осынау достық пен татулық мерекесі қарсаңында Қызылорда облыстық филармониясының «Ақмешіт» фольклорлық ансамблі Бесарық ауылдық округінде шығармашылық концерт беріп, ауыл кешін ерекше мереке-думанға бөледі.

Ансамбльдің көркемдік жетекшісі — Нұрғиса Нұрбай

Әсем ән мен күй күмбірі төгілген керемет кеште Сыр еліне белгілі өнер өкілдері ҚР «Мәдениет саласының үздігі» төсбелгісінің иегерлері Эльмира Қалхожаева, Рауза Ысқақова және республикалық конкурстардың лауреаты Бисенбек Төлеубаев өнер көрсетіп, көрермен қошеметіне бөленді. Мерекелік кеште орындалған қазақ күйлері және шетелге танымал шығармаларды тыңдарман жылы қабылдап, тамылжыта орындалған әндерден рухани-патриоттық әсер алып қайтты.

Кеш соңында ауылдың сексеннің сеңгіріне шыққан абыз ақсақалдары мен ақ жаулықты аналарына мерекелік сый-сияпат табысталып, ауыл тұрғындары өнер ұжымымен естелік суретке түсті.